பண்ணையொத்த இனிய மொழியாளாகிய உமையம்மையை ஒரு பாகமாகக் கொண்டு விசும்பில் விளங்கும் பிறையினைச் சூடி, திருநீற்றுப் பொடியினைத் திருமேனியிற் பூசிச் சுடலையினை அண்மித் திருவாரூர்ப் பெருமான் ஆடுவர்.

பண்ணின் இன்மொழியாள் - ` பண்ணினேர் மொழியாளுமை ` ( தி.5. ப.10. பா.1) இசையினிமையை ஒத்த மொழியை உடையவள். பாகமா - இடப்பாகத்தேகொண்டு என்னும் பொருளது. விண்ணினார் விளங்கும் மதி - விண்ணிலே பொருந்தி விளங்கும் மதி. சுண்ணநீறு - கலவைச் சந்தனம்போலக் கொள்ளப்படும் திருநீறு. அண்ணி - நெருங்கி.