வஞ்சனை பொருந்திய மனத்தினர் காண்பதற்கு அரியவனாய், மன்மதன் மீது நெருப்பைச் சொரிந்து அவனை அழித்த கண்ணினனாய், கங்கையும் பாம்பும் சூடிய சிவந்த சடையினை உடையவனாய், வெண்ணீறணிந்து பால் போன்ற நிறத்தினனாய்க் கூற்றுவனை முன்னொரு காலத்தில் பேரொலி செய்து அதட்டியவன் சிவந்த திருவடிகளை உடைய கடவூர் உறை உத்தமன்.

கரப்பு - மறைத்தல், வஞ்சகம். சிந்தையார் - சிந்திக்கும் சித்தம் உடையவர். காண்டற்கு அரியவன் :- ` உணர்வினேர் பெறவருஞ் சிவபோகத்தை ஒழிவின்றி உருவின்கண் அணையும் ஐம்பொறி அளவினும் எளிவர அருளினை ` ( தி.12 பெரியபுரா. 2064) ` கரவாடும் வன்னெஞ்சர்க்கரியானைக் கரவார்பால் விரவாடும் பெருமானை ` ( தி.4 ப.7 பா.2) ` கரவிலாமனத்தராகிக் கைதொழுவார்கட்கென்றும் இரவு நின்றெரியதாடி இன்னருள் செய்யும் எந்தை `, ` வஞ்சனையால் அஞ்செழுத்தும் வழுத்துவார்க்குச் சேயான் ` ( தி.6 ப.50 பா.4) ` கள்ள முள்ள வழிக்கசிவானலன் ` ( தி.5 ப.82 பா.4)` வஞ்ச மனத்தவர்கள் காணவொண்ணா மணிகண்டன் ` ( தி.6 ப.42 பா.8) காமன் - மன்மதன். அவனையும் நெருப்பு உமிழும் கண்ணால் எரித்தவன். காமனையும் கண்ணெருப்புமிழ்ந்தவன் என்க. யாவரும் அவனைக் காமுறுவர். எல்லாராலும் காமுறப்படும் அவனையும் தான் காமுறாது முனிந்து உமிழ்ந்த தீயார்ந்த கண்ணினன் நம் சிவபிரான். ` காமனையும் கண்ணழலால் விழித்தநாளோ `? உம்மை உயர்வு சிறப்பு. ( நன்னூல் சங்கரநமச்சிவாயருரை காண்க ). நீள்புனற் கங்கையும் பொங்கு அரவும் பரப்பிய செஞ்சடையன். பால் வண்ணன். ` பவளம்போல் மேனியில் பால் வெண்ணீறும் `. ( தி.4 ப.81 பா.4.) இது, குங்குமத்தின் மேனி அவன் நிறமே ` ( தி.4 ப.6 பா.3) ` பொன்னார் மேனியன் ` என்பவற்றின் முரணும் என்னற்க. ` செந்நிறத்தள் எந்நிறத்தளா யிருப்பள் எங்கள் சிவபதியும் அந்நிறத்தனாயிருப்பன் ஆங்கு ` ( திருக்களிற்றுப்படியார். 79). உரப்பிய - பேரொலி செய்து அதட்டிய. காலனை உரப்பிய சேவடியான் கடவூர் உறை உத்தமனே.