உணவுக்குரிய உண்கலன்களாகிய தட்டுக்களைக் கையில் இடுக்கிக் கொள்ளும் சமணரோடு செருக்குற்று அச் செயலையே தவம் என்று கருதி யான் அவர்களோடு இணைந்து வாழுமாறு செய்த மனமே! உனக்கு நான் என்ன தண்டனை கொடுப்பேன் ? மொட்டோடு கூடிய தாமரைகள் காணப்படும், மானிடர் ஆக்காத நீர்நிலைகளை உடைய திருவையாற்றில் விரும்பி உறையும் தேன்போன்ற எம்பெருமானோடு இப்பொழுது இணைந்து வாழும் நெஞ்சே! உன் செயல் கண்டு உன்னை நான் இப்பொழுது மெச்சுகின்றேன்.

தட்டு இடு சமணர் :- ` தட்டை யிடுக்கத் தலையைப் பறிப்பார் ` ( தி.1 ப.69 பா.10) ` தாறிடு பெண்ணைத் தட்டுடையார் ` ( தி.1 ப.101 பா.10). ` தட்டிடுக்கி உறி தூக்கி ` ( தி.2 ப.119 பா.10). ` தடுக்கால் உடல் மறைப்பார் ` ( தி.1 ப.13 பா.10). ` தடுக்குடை கையர் ` ( தி.1 ப.7 பா.10) என்பவற்றால், சமணர் பெண்ணை ( பனை ) த் தட்டு ; தடுக்கு உடையவர் என்பது வெளிப்படும். தருக்கி - செருக்குற்று. இதில் ` மனத்தினீரே `-` உள்ளத்தீரே ` என்பன, முறையே சமணம் சைவம் இரண்டனுள்ளும் நாயனார் தாம் உற்ற நிலைமையைக் குறித்த விளியாகும். நான் சமணரோடே தருக்கித் தவம் என்று எண்ணி ஒட்டினேன். மனமும் அதை ஒட்டிற்று. திரு வையாறமர்ந்த தேனோடு ஒட்டினேன். உள்ளமும் ஒட்டிற்று. ` ஒட்டிட்ட பண்பு ` உள்ளாத மனம் அது உள்ளிய உள்ளம் இது. அதனை உகந்திட்டிலர். இதனை உகந்திட்டார். பா.5 ஆவது திருப்பாடலிலும் இவ்வாறே மதியிலா நெஞ்சம் அருந்தவம் புரிந்த நெஞ்சம் என்று பகுத்துணர்த்துவதறிக. மொட்டு இடு கமலம் பொய்கை - அரும்புகளிடு செந்தாமரைக் குளம்.