வெள்ளிய பிறைமதியைச் சூடியவன். மூவுலகும் தானேயாய் இருக்கும் தலைவன். பகைவருடைய மும்மதிலையும் அழித்தவன். விளங்கும் ஒளிவடிவினன். இடப்பாகத்தது நிறத்தால் மரகதமணி போன்றவன். இன்பம்பயத்தலால் தேனும் பாலும் போன்றவன். குற்றாலம் என்ற திருத்தலத்தை உகந்தருளியிருக்கும் இளையவன். கூத்தாடுதலில் வல்லவன். யாவருக்கும் தலைவன். சிவஞானியர் ஞானத்தால் அறியப் பெற்றவன் ஆகிய பெரும்பற்றப் புலியூரானைப் பேசாத நாள் எல்லாம் பிறவா நாளே.

பால் மதி - பால்போலும் ( களங்கமில்லாத ) மதி ; ` பகுப்பாய மதி ` எனலுமாம். செற்றார்கள் - பகைத்தவர்கள். செற்றான் - அழித்தான். மரகதம் - மரகதம்போல்பவன். ` திகழொளியை, தேனை, பாலை ` என்பதனை மேலே ( தாண் -1) காண்க. குற்றாலம், பாண்டி நாட்டுத் தலங்களுள் ஒன்று. ` கூத்தாட வல்லானை ` என்றருளிச்செய்தது, எல்லா வகை ஆடலும் புரிதல் கருதி. காளியொடு ஆடினமையையும் கருதுக. ` ஞானம் பெற்றான் ` என்றதும், பான்மை வழக்கு. ` பெற்றார்கள் ` என்பதும் பாடம்.