முறுக்கவிழ்ந்த தாமரை மலர்கள் பிலிற்றிய தேன் ஓடுகின்ற கழிகள் சூழப் பெற்றதும், சுண்ணாம்பினால் இயன்ற அழகு பொருந்திய மதில்களை உடையதுமான, ஆரவாரம் மிக்க காழிப்பதியில் அழகிய கூந்தலையும் நல்ல நெற்றியையும் உடைய உமையம்மையின் கணவனே, அரனே! என்று மனம் உருகிப் பாடும் அடியவர்களை மிக்க துன்பங்கள் எவையும் அடையா.

காழியில் எழுந்தருளியிருக்கின்ற உமையொரு பாகனை அரனே என்று மனம் இளகப்பாடுகின்ற அடியார்கட்குத் துன்பம் சேரா என்கிறது. இளகக் கமலத்து ஈன்கள் இயங்கும் கழி - முறுக்கவிழ தாமரையிலிருந்து உண்டான கள் ஓடுகின்ற கழி. களகப்புரிசை - சுண்ணாம்புச் சாந்து பூசப்பெற்ற மதில். கவின் - அழகு. அளகம் - கூந்தல். நல்நுதலி - நல்ல நெற்றியையுடையாளாகிய பார்வதி. உள் அகப்பாடும் - மனம் பொருந்தப்பாடுகின்ற.