திருமுறை 4 - பதிகம் 002 - பன்னிரு திருமுறை பாட்டும் பொருளும்

நான்காம் திருமுறை
113 பதிகங்கள், 1070 பாடல்கள், 50 கோயில்கள்

002 திருவதிகை வீரட்டானம்


			பாடல் : 1 2 3 4 5 6 7 8 9 10

இப்பதிகப் பாடல்களை ஒரே பக்கமாகக் காணச் சொடுக்குக
பாடல் எண் : 5	பண் : காந்தாரம்

பலபல காமத்த ராகிப் பதைத்தெழு வார்மனத் துள்ளே
கலமலக் கிட்டுத் திரியுங் கணபதி யென்னுங் களிறும்
வலமேந் திரண்டு சுடரும் வான்கயி லாய மலையும்
நலமார் கெடிலப் புனலு முடையா ரொருவர் தமர்நாம்
அஞ்சுவதி யாதொன்று மில்லை அஞ்ச வருவது மில்லை.

× 4002005பதிக வரலாறு :

பசுபதியார்அடியார்க்கு நஞ்சும் அமுதாயிற்று . அவ்வற் புதத்தைக் கண்டனர் அமணர் . அஞ்சினர் ; ஓடினர் ; காவலனை மேவினர் . ` நஞ்சு கலந்து ஊட்டிடவும் துஞ்சுதல் இலன் . நமது சமயத்து நஞ்சுதீர் மந்திரவலிமையே அதற்குத் துணையாயிற்று . அவன் துஞ்சிலனேல் , எம் உயிரும் நின்முறையும் துஞ்சுவது திடம் ` என்றுரைத்தனர் . மதிகெட்ட மன்னவனும் அக் கதி கெட்டார் பேச்சைக் கேட்டான் . ` அவனைக் கடியும் திறம் எவ்வாறு ?` இது மன்னன் வினா . ` நின்கொற்ற வயக்களிற் றெதிரே விடுவதுதான் இனிச் செய்யத் தக்கது `. இது அமணர் விடை . காபாலி அடியவராம் வாகீசத் திருவடிமேல் கோபாதி சயமான கொலைக் களிற்றைவிடச் சொன்னான் , பூபாலர் செயலை மேற்கொண்ட புலைத்தொழிலோன் , கூற்றினும் மிக்க தாய்க் களிற்று வடிவில் வரும் மதவெற்பு ஊழிமுடிவில் எழும் தீயைப்போல் சினந்து விரைந்து ஓடிப்போந்தது . போந்தால் என்ன ? அப்பரோ அஞ்சுவார் ? அப்பர் உள்ளத்துள் அப்பர் பொற் கழல் இருக்கின்ற தெளிவு , மதகரியை அஞ்சும் மயக்கம் தோன்றாதவாறு தடுத்துப் பாடுவித்தது . அதுவே மண்ணுலகு உய்ய எடுத்து மகிழ்வுடனே பாடியருளிய இத்திருப்பதிகம் . இதில் , வெஞ்சுடர் மூவிலைச் சூல வீரட்டர் அடியோம் நாம் அஞ்சுவது இல்லை என்று மகுடம் அறைந்திருப்பது காண்க .

இக்கோயிலின் படம்

இக்கோயிலின் காணொலி

காணொலித் தொகுப்பை அன்பளிப்பாகத் தந்தவர்கள்

இராம்சி நாட்டுபுறப் பாடல் ஆய்வு மையம்,

51/23, பாண்டிய வேளாளர் தெரு, மதுரை 625 001.
0425 2333535, 5370535.
தேவாரத் தலங்களுக்கு இக் காணொலிக் காட்சிகள் குறுந்தட்டாக விற்பனைக்கு உண்டு.

பொழிப்புரை:

பலப்பலவிருப்பங்களை உடையவராய் அவற்றைச் செயற்படுத்தத்துடித்து விரையும் மக்களின் உள்ளத்தில் கலந்து பிறழச் செய்யும் கணபதியாகிய ஆண்யானையையும், இருளைப்போக்கும் வலிமை மிக்க சூரியன் சந்திரன் ஆகிய இரண்டு ஒளிகளையும், மேம்பட்ட கயிலை மலையையும், நன்மைகள் நிறைந்த கெடில நதித் தீர்த்தத்தையும் உடைய அதிகை வீரட்டரின் அடியேம் யாங்கள் ஆதலின் அஞ்சுவது யாதொன்றும் இல்லை. அஞ்ச வருவதும் இல்லை.

குறிப்புரை:

பலபல காமத்தர் - ` ஒரு பொழுதும் வாழ்வது அறியார் கருதுப கோடியும் அல்ல பல ` ` எண்பது கோடி நினைந்து எண்ணுவன ` எனத் திருக்குறளிலும், மூதுரையிலும் உரைத்தவாறு காண்க. எண்ணியவாறே எண்ணங்களை இடையூறு நீக்கி ஈடேற்றும் கணபதியை வழிபட்டுக் கேட்கும் வரங்களைப் பலபல காமம் என்றருளினார். கலமலக்கிடுதல் - கலந்து பிறழச் செய்தல். நினைத்த வரங்களை எல்லாம் நல்க, அவை ஒன்றொடு ஒன்று கலந்து, பெற்ற முறையில் அன்றிப் பிறழ்ந்து பயன் கொடுக்கின்றமை பற்றிக் கலந்து பிறழ்தலாம். மலக்கிடுதல் - மலங்கச் செய்தல். மலங்க - கெட ; சுழல ; பிறழ. ( சிந்தாமணி ) கல என்னும் முதனிலை ஈண்டு எச்சப் பொருட்டாய் நின்றது. ( இலக்கணக் கொத்துரை ) கலக்கி மலக்கிட்டு, தி.4 ப.1 பா.8 பார்க்க. கணபதி யென்னும் களிறும் உடையார் - ` தனது அடி வழிபடு மவர்இடர் கடி கணபதிவர அருளினன் ` ( தி.1 ப.123 பா.5). வலம் ஏந்து இரண்டு சுடர் - இருளை ஒழிக்கும் வலிமை தாங்கிய செய்யதும் வெளியதுமான இருகதிர். ஞாயிறும் திங்களும் கண்ணாக உடையார். வான் கயிலாய மலை - சிவலோகம். தூய்மை வெண்மை குறித்தது. நலம் - முழுகுவார் தம் கழுவாயில்லாத தீவினைகளையும் தீர்க்கும் நன்மை.

பிற மொழிகளில் பாடலைப் புரிந்து கொள்ள / Translations:

తెలుగు / தெலுங்க

పలుపలు కోర్కెలతో, వాటిని నెరవేర్చమని కోరితే తీర్చే శక్తిగల గణపతి అనే మగఏనుగును, సూర్యచంద్రుల వెలుగును మించే వెలుగులు చిమ్మే కైలాస శిఖరాన్ని, మంచి చేకూర్చే కెడిల్ తీర్థాన్ని గల అదిగై వీరట్టాన వెలసిన స్వామికి దాసులం మేం. అందువల్ల భయపడవలసింది, భయపడతగ్గది ఏదీ లేదు.

అనువాదము: ఆచార్య సత్యవాణి, ద్రావిడ విశ్వవిద్యాలయం, కుప్పం, 2015