இக்கோயிலில் 11 கல்வெட்டுக்கள் உள்ளன. சோழருடையது எட்டும், பாண்டியரது ஒன்றும், விஜயநகரத்தரசனது இரண்டுமாக மொத்தம் பதினொன்றாகும், இரசேந்திரன் தனது 30-ஆம் ஆண்டில் அதிகாலையில் இரண்டு விளக்குக்கள் எரிக்கவும், மார்கழி, வைகாசி மாதங்களில் விழாக்கள் நடத்தவும் திருக்கைச்சின முடையாருக்குப் பாண்டிய மண்டலத்தில் பூதானம் செய்தான். இராஜராஜன் காலத்தில் அரங்கன் ஆட்கொண்டான். கொடுத்த 50 காசுக்காக 3 பட்டர்கள் நுந்தாவிளக்கு வைப்பதாக ஒப்புக் கொண்டார்கள். குலோத்துங்கன் காலத்தில் அன்னதான நங்கை அதுபோலப் பணம் கொடுத்தாள். இராஜாதிராஜன் காலத்தில் 100 காசுகள் பெற்றுக்கொண்டு விளக்கு வைக்கப்பட்டது. அதுபோலவே குலோத்துங்கன் நாளிலும் செய்யப்பட்டது. பாண்டியரில் சுந்தர பாண்டியன் தனது பத்தாம் ஆண்டில் வைகாசி வசந்தோற்சவத்திற் காகப் பூதானம் செய்தான். விஜய நகரத்தாரில் சகம் 1307ல் கச்சினப் பற்றில் முத்தரசர் பெயரில் உள்ள ஊரின் நிலங்களில் சதுர்வேதிப் பட்டர்களின் வரி தள்ளுபடி செய்யப்பட்டது.

இத் திருக்கோயிலில் சோழ மன்னர்களில் திருபுவனச் சக்கரவர்த்தி விக்கிரம சோழதேவர், திருபுவனச் சக்கரவர்த்தி இராஜராஜ தேவர், திருபுவனச் சக்கரவர்த்தி குலோத்துங்க சோழதேவர், திருபுவனச் சக்கரவர்த்தி இரண்டாம் இராஜாதிராஜ தேவர், மூன்றாங் குலோத்துங்க சோழதேவர் இவர்கள் காலங்களிலும், பாண்டியரில் ஜடாவர்மன் திருபுவனச் சக்கரவர்த்தி சுந்தரபாண்டியர் காலத்திலும், விஜயநகர பரம்பரையில், வீரபூபதி வீரப்பண்ண உடையார் காலத்திலும் பொறிக்கப் பெற்றுள்ள பதினொரு கல்வெட்டுக்கள் இருக்கின்றன.

இவ்வூர், இரண்டாம் இராஜாதிராஜன் கல்வெட்டில் இராசேந்திரசோழ வளநாட்டு ஆர்வலக்கூற்றத்துக் கச்சினம் எனவும், விஜயநகரபரம்பரை வீரப்பண்ண உடையார் கல்வெட்டில், இராஜேந்திர சோழ வளநாட்டு வடக்கால் வெண்டாழை வேளூர்க் கூற்றத்துக் கச்சினப்பற்று எனவும் குறிக்கப்பெற்றுள்ளது. இக் கோயிலுக்குரிய நிலங்கள் முதலாம் குலோத்துங்க சோழ தேவரின் 40 ஆம் ஆட்சி யாண்டில் கல்லில் வெட்டப்பட்டுள்ளன. இச்செய்தியை விக்கிரம சோழதேவரின் 12-ஆம் ஆண்டுக் கல்வெட்டு குறிப் பிட்டுள்ளது. (இக்கல்வெட்டில் பெரியதேவர் குலோத்துங்கசோழ தேவர் என்பது முதற்குலோத்துங்க சோழனாகும்).

ஜடாவர்மன் சுந்தரபாண்டியன் காலத்தில் சிறுகீழூரான முடிமான் தம்பிரான் சோழ சதுர்வேதி மங்கலத்துச் சோமதேவ பட்டன் மகன் கேசவப்பட்டன் இக்கோயில் வைகாசி வசந்த விழாவிற்கு நிலம் கொடுத்திருந்தான்.

பாண்டிநாட்டு. சோழபாண்டிய மண்டலத்து, மதுரோதய வளநாட்டு, பாலைக்குறிச்சி, ஆரியன் திருமறைக்காடு உடையான் மார்கழி, வைகாசி விழாக்களுக்கும் காலைசந்திகளுக்கும் நுந்தா விளக்குக்களுக்கும் இராசேந்திர சோழதேவன் காலத்தில் நிலம் அளித்திருந்தான்.