திருஈங்கோய் மலை, காவிரியின் வடகரைத் தலங்கள் அறுபத்து மூன்றில் இறுதியானதாக அமைந்துள்ளது. அதனை முன்பே சிறப்பித்துப் பாடியவர் நக்கீரதேவ நாயனார். அவரைப் பற்றிய குறிப்புக்கள், `கயிலை பாதி காளத்தி பாதி யந்தாதி`க் குறிப்பில் தரப்பட்டன.
`திருஈங்கோய்மலை எழுபது - என்பதில், ``எழுபது`` என்பது எண்ணாகுபெயராய் அத்துணையான வெண்பாக்களைக் குறித்துப் பின், கருவி யாகுபெயராய் அவற்றாலாகிய பிரபந்தத்தைக் குறித்தலின் இருமடியாகுபெயர். நூறு, ஐம்பது, முப்பது ஆகிய பாக்களாலன்றி அறுபது. எழுபது ஆகிய பாக்களாலும் முற்காலத்தில் பிரபந்தங்கள் யாக்கப்பட்டன. அவ்வழக்கம் இக்காலத்தில் மறைந்து விட்டது. இதன்கண் வரும் எழுபது வெண்பாக்களும் திருஈங்கோய் மலையின் சிறப்பையே கூறி, அது சிவபெருமானது இடமாக விளங்கும் தலைமைப் பாட்டினைக் குறிக்கின்றன.
