01. తిరువాశకం - సివబురాణం
నమఃశ్శివాయ అను నామము వర్థిల్లాలి!
ఆ నాథుని దివ్య చరణారవిందములు వర్థిల్లాలి!
కనురెప్పపాటుకాలంకూడా నా హృదయమునుండి వైదొలగని ఆ ఈశ్వరుని పుణ్య పాదారవిందములు వర్థిల్లాలి!
కోకళియను క్షేత్రమునందు కొలువైయున్న మాణిక్యమువంటి ఆ గురునాథుని దివ్యపద్మపాదములు వర్థిల్లాలి!
వేదాగములనన్నింటా నిండియుండి మమ్ములను రక్షించు ఆ పరమేశ్వరుని విశిష్ట తామర చరణములు వర్థిల్లాలి!
ఒంటరివాడు, అనేక రూపములై సృష్టియంతటా నిండియుండువాని పాద పద్మములు వర్థిల్లాలి!
ల్లాలి! 5
నా మనోవేగాన్ని నియంత్రించు ఆ మహారాజు దివ్య చరణారవిందములకు విజయీభవ!
జననమరణ వలయమునుండి నన్ను విడిపించు ఆ భవ్య పాదారవిందములకు విజయీభవ!
మనసారా తలచనివారికి అందనంత దూరములోనుండు ఆ ఈశ్వరుని పాదపద్మములకు విజయీభవ!
భక్తితో కైమోడ్పులు సమర్పించువారి మనసులకు ఆనందమునొసగు ఆ రారాజు తామరపద్మములకు విజయీభవ! 10
మహేశ్వరుని మంగళ చరణములకు వందనములు!
మా తండ్రి పాదపద్మములకు వందనములు!
ఆ జ్యొతిస్వరూపుని చరణకమలములకు వందనములు!
వాత్సల్యముతో నిండియుండు ఆ నిర్మలుని పాదారవిందములకు వందనములు!
మాయతో కప్పబడియుండు ఈ జననమరణ వలయమునుండి విదిపించు ఆ చక్రవర్తి తామరవిందములకు వందనములు!
దివ్యమైన పెరుందురై అనబడు క్షేత్రమందు వెలసియున్న మన భగవంతుని విశిష్ట చరణములకు వందనములు! 15
అమితానందమును ప్రసాదించుఎత్తైన శిఖరమువంటి ఆ ఈశునికి వందనములు!
ఆ పరమేశ్వరుడు నా హృదయాంతరములలో నిలిచియుండి
నిరంతరమూ ఎడతెగక తన దయ కురిపించుచుండ,
ఆతడి దివ్య చరణకమలములకు నమస్కరించి
మనసు ఉప్పొంగుటచేత,
సంచిత పాపకర్మములను పోగొట్టుకొనుటకై ఈ శివపురాణమును గానము చేయుచున్నాను! 20
నుదుటనున్న మూడవ నేత్రముతో చల్లని తన కరుణను అందరిపై
ప్రసరింపజేయుటకై అరుదెంచిన ఆ త్రినేత్రుడు
నా తలపులకు అందని సౌందర్యవంతుని దివ్య చరణములకు వందనమొసగి,
భూమ్యకాశములంతట నిండియుండు
జ్యోతిస్వరూపుడవై, సర్వాంతర్యామియై,
హద్దులులేని అఖండుడివైన నీయొక్క దివ్య కీర్తిని
పాపాత్ముడనైన నాకు కొనియాడ తెలియుటలేదు! 25
గడ్డిపోచనై, చెట్టు చేమనై, క్రిమి కీటకానినై, వృక్షమునై,
పలుమృగములనై, పక్షినై, సర్పమునై,
రాతినై, కోతినై, మనుష్యునిగ మారి, దయ్యమునై , భూతమునై,
బలమైన రాక్షసుడినై, మునినై, ఋషినై, దేవతనై,
ఈ మాయాలోకమందున్న ఈ స్థావరజంగమందు 30
ఓ! నాథా! ఇటువంటి పలు జన్మములనెత్తి అలసితిని! సొలసతిని!
సత్యమైన, స్వచ్ఛమైన నీ పాదారవిందములనుగాంచి
విముక్తడయ్యానిప్పుడు!
నా బాగుకొరకు ఓంకార రూపమందు నా హృదయములోనున్న నీవు సత్యవంతుడవు! నిత్యవంతుడవు!
నిర్మలుడవు! వృషభవాహనుడవు!
వేదములన్నియూ నిన్ను ‘అయ్యా!’
అని ఘోషిస్తున్న పరమాణుడవైన నాథుడా! 35
శీతోష్ణస్థితులను ఎన్నటికీ ప్రసాదించు నిర్మలుడవు!
మాయచే కప్పబడు భౌతికపరమైనవన్నింటినీ తొలగించి
నన్ను అనుగ్రహించువాడవు!
ఉన్నతమైన జ్యొతిస్వరూపముగ వెలుగొందుచున్నbr>
కాంతిస్వరూపుడవు నీవే!
అఙ్ఞానుడనైన నాకు, ఓ మధురమైన నాథుడా!
నా అఙ్ఞానమును పోగొట్టి సద్బుద్ధిని ప్రసాదించువాడివి!40
ఆదిమధ్యాంత రహితుడవై, విశ్వమంతటినీ
సృష్టించి, రక్షించి, ప్రళయమందు లయమొనర్చి
మమ్మనుగ్రహించువాడవు!
పునఃసృష్టించి, నీ సేవ చేయుటకై నన్ను మరల
జన్మింపజేయువాడవు!
సుగంధ పుష్పపరిమళమువలే నా హృదయాంతరమంతటా
విస్తరించినవాడవు!
మార్పుచెందక, విశ్వమంతతా సుస్థిరంగా నిలిచియుండు
వేదస్వరూపుడవు! 45
అప్పుడే పితికిన పాలలో నేతిని, చెఱకు రసమును కలిపినట్లు,
ఉన్నత శివభక్తుల ఆలోచనలయందు మధురముగ నిండియుండి,
వారిని జననమరణవలయమునుండి తప్పించు నా దైవము!
ఈశానం, తత్పురుషం, అఘోరం, వామదేవం, సద్యోజాతం అనబడు
ఐదు ముఖములు కలిగి, ఐదు వర్ణములతో కూడియుండు
నీవు, దేవాది దేవతలకు కూడ
కానరానివాడవైన నా భగవంతుడవు! 50
చీకటిమయమైయుండు మాయచే కప్పబడు కర్మములనుండి,
మాయకు లోబడి నేనొనరించిన పాపకర్మముల చీకటినంతటినీ తొలగించి,
పుణ్యకర్మమునకులనబడువాటిని,బలమైన త్రాటితో బందించి,
అందమైన బాహ్య చర్మముతో ఈ శరీరమందలి రక్తమాంసములను మూసియుంచి,
దుర్గంధములైన మలములన్నియూ నవ ద్వారములగుండా
వెలికివచ్చునట్లు నీ అదుపాఙ్ఞనలలో ఉండగ
పంచేంద్రియములు వంచనను చేయుచుండ, నిర్మలమైన 55
మృగమయమైయుండు (ఖలునకు నిలువెల్లా విషమను విధముగ)
మనస్సుగలనన్ను, లోపమెరుగని నీ నామములకు ప్రేమను రంగరించి,పలుకుచు, నా హృదయములో
రమించుచుండ, పాపకర్మములు ఒనరించు నావంటివారి
చిరుజన్మముల కొరకు ఈ భువికి అరుదెంచి
మమ్ములను, అనుగ్రహించి నీయొక్క దివ్య పాదారవిందములను
కాన్పరచి, శునకముకంటే హీనమైన వాడినైన నావంటి భక్తులకు,60
మాతృత్వభావనకంటే మిన్నయైన ఆ దైవము,
నిష్కళంకమైన ప్రకాశమొతోకూడియుండు ఆ దివ్య జ్యోతి,
పరిపూర్ణముగ వికసించిన పుష్పమువంటి ఆ భగవంతుడు,
తేజోమయునిగ మధురమైన అమృతమువంటి శివపురమందు వెలసియున్నాడు!
బంధపాశముల ముడులను తెగ్గొట్టు శ్రేష్టమైన వాడు ఆ నాథుడు!
దయతో అనుగ్రహించి మనసులోనున్న వంచనలనన్నింటినీ తొలగించువాడు ఆ ఈశుడు!65
స్వచ్ఛమైన జలముతోనిండియున్న నదివంటి కారుణ్యము కలవాడు!
తనివితీరని మధురమైన అమృతధారవంటి
అనుగ్రహమొనరించువాడు!
హద్దులులేనట్టి విధమున కొలవలేనటువంటి పెద్ద దైవము నీవే!
కొనియాడుచు అనునిత్యమూ తలచు భక్తుల మదిలో
నిరంతరమూ వెలుగుచుండు జ్యోతిస్వరూపుడవు!
సముద్రజలము మేఘములుగ మారి, వర్ష రూపమున, మరల ఆ
సముద్రమునేజేరునట్లు, నా ఆత్మగ నిలిచిచియుండువాడా!
సుఖ, దుఃఖములు లేనివాడవైయుండి, భక్తుల సుఖ, దుఃఖములను గమనించుచుండువాడవు!70
ఉండియూ లేనివానివలే గోచరింపబడుతూ, భక్తులకు
ప్రియమైనవాడివి!
ప్రకాశవంతమైన జ్యోతిస్వరూపుడవు! చిమ్మచీకటి కూడ నీవైయుండు
ఉన్నతమైన వాడవు నీవే!
ఆది, మధ్యాంతరహితుడవైననూ భక్తులను ఎల్లవేళలా
కాపాడుచున్నవాడవు!
అయస్కాంతమువలే వెదకుచూ నన్ను నీవైపుకు ఆకర్షింపజేసుకుని,
రప్పించుకున్నవాడవు!
పరిపూర్ణ ఙ్ఞానవంతుల మనసుకు, ఆలోచనలకు కూడ
అందనంతటివాడవు! 75
సూక్ష్మముగ విచారించిననూ వారి బుద్ధికి అందనంతటి సూక్ష్మాతి
సూక్ష్మమంతటి ఙ్ఞానివి నీవు!
పుట్టుట, గిట్టుట, ఆ నడుమ బంధములు లేనటువంటి దివ్యమైన
భగవంతుడవు నీవు!
ఎల్లవేళలా నన్ను కంటికిరెప్పలా కాపాడు కాపాలి! కానరాని పరంజ్యోతి
స్వరూపుడవు!
ఎల్లలులేనట్టి ప్రవాహమువంటి వాడవైన నా తండ్రీ!
విస్తరించియున్న దీపకాంతియై, వివరించలేనటువంటి
మధురానిభూతివైయుండు నాథుడవు! 80
మార్పుకులోబడు ఈ సువిశాల విశ్వమందు విధవిధములైన
మార్గములను తెలియపరచుచు, నా మదిలో నిలిచియున్న ఆ
విశ్వవ్యాపకుడవు నీవే!
ఊరుచుండు ఆ అమృతధారలను నాచే ఆరగింపజేయు నా ప్రభువు నీవే!
పలు విధముల వికారములతో కూడియుండు ఈ శరీరమందలి ప్రాణము నీవైయుండ,
భరించశక్యముకాని ఓ నాథా! ఓ ఈశ్వరా! అని 85
కొనియాడుచు, నీయొక్క కీర్తిని, అసత్యమైనటువంటి ఈ భౌతిక
శరీరమందున్న సత్యమైన నిన్ను తెలుసుకొనగలిగాను!
అటువంటి నన్ను మరల ఈ పుడమిపై జన్మించకుండా నా
కర్మఫలములనన్నింటినీ తొలగించి, మరల అసత్యమైన ఈ భౌతిక
కాయమును ధరింపకనుండునట్లు కట్టడిజేయువాడవు నీవే!
అర్థరాత్రిజామున అలుపెరగక నటనమాడు నాథుడా! (మేము నిద్రావస్థలోయుండగ మమ్ము అనుక్షణమూ కాపాడు దైవము!)
తిల్లైనగరమందు (చిదంబరమందు) నటనమాడు దక్షిణ పాండ్యదేశస్థుడా! 90
‘అయ్యో!’ అని నిరంతరమూ పలికించుచుండు, దుఃఖభరితమైన జన్మలను పోగొట్టువాడా!
చెప్పుటకు వీలుకాని వాడవని చెప్పి, నీ దివ్య చరణములపై
గానముచేసిన ఈ శివపురాణ భావార్థమును గ్రహించి పాడినవారు
ఆ శివపురమందు వెలసియున్న
పరమేశ్వరుని పాదపద్మములందుండ,
అట్టివారిని వినయముతో పలువురు కొనియాడెదరు!95
అనువాదం: సశికళ దివాకర్, విశాఖపట్నం
2023